Форумы Арктогеи (philosophy): СТАРАЯ ВЕРА для НОВОЙ РУСИ: Из Жития Феодосия Печерского (пера Нестора)

2963: By Нил on Воскресенье, Декабрь 17, 2000 - 18:05:

Растый убо телом и душею влеком на любовь Божию, и хожаще по вся дни в церковь Божию, послушая божественных книг со всем вниманием. Еще же и к детям играющим не приближашеся, якоже обычай есть уным, но и гнушашеся играм их. Одежа же его бе худа и сплатана. О сем же многажды родителема его нудящема и облещися в одежу чисту и на игры с детьми изыти. Он же о сем не послушааще ею, но паче изволи быти яко един от убогих... Сущю же тогда божественному Феодосию 13 лет. Оттоле же начат на труды паче подвижней бывати, якоже исходити ему с рабы на село и делати с всякыим смирением. Мати же его оставляше й, и не велящи ему тако творити, моляше й пакы облачитися в одежу светлу и тако исходити ему со сверстники своими на игры... Оному о том не послушающу ея =, и якоже многажды ей от великия ярости разгневатися на нь и бити й, бе бо и телом крепка и сильна, якоже и муж. Аще бо кто и не видев ея, ти слышааще ю беседующу, то начняше мнити мужа ю суща... Якоже и властелин града того, видев отрока в таком смирении и покорении суща, влюби й зело и повеле же ему, да пребывает у него в церкви, выдаст же ему и одежу светлу, да ходит в ней. Блаженный же Феодосий, пребысть в ней ходя мало дней, яко некую тяжесть на собе нося, тако пребываше. Таче сним ю, отдаст ю нищим, сам же в худыя порты облекся, ти тако хожаще. Властелин же, видевы й тако ходяща, и пакы ину выдаст одежу, вящу первыя, моля й, да ходить в ней. Он же сним и ту отда. Сице же многажды сотвори, якоже судии то увидевшу, большим начат любити й, чюдяся смирению его. По сих же божестевнный Феодосий шед к единому от кузнец, повеле ему железо счепито сковати, иже и возьм и препоясася им в чресла своя, и тако хожаще. Железу же узку сущу и грызущюся в тело его, он же пребываше, яко ничсоже скорбна от него приемля телу своему. Таче, яко ишедшем днем многом и бывшу дни праздничну, мати его начать велети ему облещися в одежу светлу на служение всем бо града того вельможам, в то день возлежащим на обеде у властелина. И повелено бе убо блаженному Феодосию предсотяти и служити. И сего ради поущашети й мати его, да облечется в одежу чисту, паипаче же якожа и слышала бе, еже есть сотворил. Якоже ему облачащуся в одежу чисту, прост же сы умом неже блюдыйся ея. Она же прилежно зряаше, хотящи истее видети, и се бо виде на срачице его кровь сущу от вгрызения железа. И раждьгошися гневом на нь, и с яростию вставши и растерзавши сорочицу на нем, биющи же й, отъя железо от чресл его. Божий же отрок, яко ничсоже зла прият от нея, облекся и, шед , служаще пред возлежащим и со всякою тихостию.